Barazimi i Portugalisë ndaj Republikës Demokratike të Kongos ka sjellë reagime të shumta, sidomos pas kritikave që u drejtuan ndaj Cristiano Ronaldos.
Pas ndeshjes, motra e yllit portugez, Katia Aveiro, reagoi në rrjetet sociale, duke pranuar se paraqitja e Portugalisë ishte zhgënjyese, por njëkohësisht doli në mbrojtje të vëllait të saj.
“Kombëtarja portugeze ishte një zhgënjim i plotë. Skuadra papritur harroi si të pasonte, si të fitonte topin apo si të nisej në kundërsulm. E gjithë ndeshja u luajt nga mesfusha drejt mbrojtjes.
Sigurisht, fajin do t’ia vënë vetëm një personi. Çfarë turpi… Për fat të mirë, ai ka shpatulla të forta. Dhe kushdo që kupton nga futbolli, e sheh qartë. Kjo Kupë Bote është e çuditshme, vërtet e çuditshme…”, shkroi Katia në Instagram.
Mesazhi u interpretua si një mbështetje e drejtpërdrejtë për Ronaldon, i cili u kritikua pas debutimit jo të mirë të Portugalisë në Botëror.
Më vonë, tifozët vunë re se postimi ishte fshirë nga “story” i Katia Aveiros në Instagram, ndërsa arsyeja e këtij vendimi mbetet ende e paqartë.
Pavarësisht zhgënjimit në ndeshjen e parë, në kampin portugez besohet se gjithçka mbetet e hapur dhe se ky nuk është fundi për skuadrën e Roberto Martínez.
