Lautaro Martínez nuk e nisi Botërorin ashtu siç priste. Pas fitores së Argjentinës ndaj Algjerisë, sulmuesi i Interit u largua nga stadiumi me fytyrë të zymtë dhe pa folur me mediat.
Lojtarët e Argjentinës kanë një mënyrë për të shmangur kontaktin me gazetarët pas ndeshjeve: dalin të gjithë bashkë, në rresht, dhe kalojnë shpejt drejt autobusit të skuadrës. Këtë herë, Lautaro ishte i pari në rresht, por nuk u ndal asnjë moment, edhe pse shumë gazetarë thërrisnin emrin e tij.
Sulmuesi dukej i zhgënjyer, jo për zëvendësimin nga Scaloni dhe as për rezultatin, pasi Argjentina fitoi ndeshjen e parë si kampione bote. Problemi ishte paraqitja e tij personale. Në mbrëmjen e madhe të Lionel Messit, Lautaro nuk arriti të linte gjurmë.
Përveç një asistimi për Messin që u anulua nga VAR-i dhe një goditjeje diagonale të ndalur nga Luca Zidane, kapiteni i Interit kaloi thuajse në hije.
Situata nuk është alarmante, pasi Botërori është ende i gjatë dhe Lautaro ka eksperiencë për të menaxhuar momente të tilla. Por frika është se historia e Katarit mund të përsëritet.
Edhe në Botërorin 2022, Lautaro e nisi si titullar, por më pas humbi vendin ndaj Julián Álvarez, i cili hyri në formacion dhe nuk doli më prej tij.
Tani Alvarez ka lënë pas problemin në kavilje dhe mund të promovohet si titullar në ndeshjen e dytë të grupit, të hënën në Dallas kundër Austrisë.
Megjithatë, këtë herë Lautaro është një lojtar më i fortë dhe më i pjekur se katër vite më parë. Ai ka ende kohë për të kthyer situatën në favorin e tij dhe për të treguar se mund të jetë protagonist në këtë Botëror.
