Lionel Messi vazhdon të marrë vëmendjen e gjithë botës pas paraqitjes magjike ndaj Algjerisë në debutimin e Argjentinës në Botërorin 2026.
Ylli argjentinas shënoi tripletë në Botërorin e tij të gjashtë, duke barazuar rekordin e Miroslav Kloses si golashënuesi më i mirë në historinë e Kupës së Botës. Pas ndeshjes, mediat ndërkombëtare nuk kursyen lavdërimet për 38-vjeçarin.
Në Argjentinë, e përditshmja Olé e cilësoi paraqitjen e tij si “show i Messit”, duke shkruar: “Le të mos mbarojë kurrë ky tango”.
Në Itali, La Gazzetta dello Sport shkroi: “Messi i përjetshëm, tripletë në debutimin e Botërorit të tij të gjashtë”, ndërsa Corriere dello Sport shtoi: “Messi, je një spektakël i vërtetë”.
Edhe në Francë, L’Equipe iu përul kapitenit argjentinas me titullin: “Një, dy, tre… Rroftë Leo Messi”. Le Parisien e cilësoi natën e tij si një përgjigje të fortë ndaj Mbappés, duke e quajtur “legjendare” paraqitjen e argjentinasit.
Në Brazil, Globoesporte përdori një titull të thjeshtë, por domethënës: “Messi, Messi dhe Messi”, ndërsa në Angli Daily Mail shkroi: “Messi magjik”.
Shtypi katalanas shkoi edhe më tej. Mundo Deportivo shkroi se Messi “e rrëzoi Pelén dhe barazoi Klosen për të qenë më i madhi i të gjitha kohërave”, ndërsa Sport theksoi se në moshën 38-vjeçare ai vazhdon të tregojë pse konsiderohet më i miri në histori.
Pas tripletës ndaj Algjerisë, Messi nuk i dha vetëm fitoren Argjentinës, por shtoi edhe një tjetër kapitull historik në karrierën e tij të jashtëzakonshme.
