Një shtetas gjerman është qëlluar për vdekje nga një shkëmbim zjarri në afërsi të kufirit me Kanadanë. Ai dhe shoqëruesja e tij Teresa Youngblut, një shtetase amerikane, ishin nën vëzhgim nga FBI për disa ditë. Gjithashtu Youngblut e cila ka mbetur e plagosur nga të shtënat, do të dërgohet para një gjykatësi federal në SHBA të hënën. Siç raportohet shoferi i veturës ka hapur zjarr ndaj oficerëve, kur ata po kryen një kontroll automjeti në Interstate 91 rreth 32 kilometra në jug të kufirit. Bëhet e ditur se nga të shtënat, përveç gjermanit, i vrarë ka mbetur edhe një oficer i Patrullës Kufitare të Shteteve të Bashkuara. Sipas FBI-së, gjermani është Felix B., i cili ndodhej në SHBA me një vizë turistike të vlefshme. Akuzat kundër Youngblut përfshijnë dy pika: përdorimin e një arme vdekjeprurëse në sulmin ndaj një agjenti të Patrullës Kufitare të SHBA-së dhe përdorimin dhe shkarkimin e një arme zjarri gjatë dhe në lidhje me atë sulm.
Por, ende nuk është ngritur asnjë akuzë për vrasjen e agjentit të Patrullës Kufitare. Ndryshe, hetuesit kishin “monitoruar rregullisht” Youngblut dhe Felix B. që nga 14 janari, pasi një punonjës në një hotel ku ata po qëndronin vuri re se Youngblut ishte i armatosur. Kur u morën në pyetje nga oficerët e një agjencie federale, çifti tha se ishin në zonë duke kërkuar pasuri të paluajtshme. Ata refuzuan “pyetjet më të detajuara”. Gjatë kontrollit të veturës pas të shtënave, autoritetet gjetën telefona të mbështjellë me fletë metalike, një helmetë balistike, syze për natën, respiratorë dhe municione.
