Pas fjalimeve para Kryeministrisë, qytetarët kanë vijuar protestën me marshim në rrugët e Tiranës, duke përsëritur thirrje kundër klasës politike dhe për ndryshim.
Pas fjalimeve të mbajtura para godinës së Kryeministrisë, protestuesit kanë nisur marshimin në rrugët e kryeqytetit, duke vijuar protestën që po zhvillohet për të 12-ën ditë radhazi.
Me thirrjet “Shqipëri e re”, “Revolucion, revolucion”, pjesëmarrësit u drejtuan në grup përgjatë akseve kryesore të Tiranës, duke shprehur pakënaqësinë ndaj klasës politike dhe duke kërkuar ndryshime në qeverisjen e vendit.
Gjatë marshimit janë dëgjuar edhe thirrje të tjera kundër figurave kryesore politike, ndërsa protestuesit kanë theksuar se lëvizja tashmë ka tejkaluar kauzën fillestare të mbrojtjes së mjedisit në Zvërnec dhe Nartë.
Sipas pjesëmarrësve, protesta është kthyer në një lëvizje më të gjerë qytetare, e fokusuar te e ardhmja e fëmijëve, të rinjve, lufta kundër korrupsionit dhe mbrojtja e interesit publik.
Aktualisht protestuesit u nisën nga kryeministria, për të përshkruar bulevardin deri te bashkia, e më pas te Rruge e Barikadave, rruga e Durrësit, Zogu i Zi, e në drejtim të ish-sheshit Shqiponja, për të shkuar më pas në zonën e Astirit.
