Omar Abdulkadir Artan, arbitri somalez të cilit iu refuzua hyrja në Shtetet e Bashkuara pak ditë më parë, do të gjykojë finalen e Superkupës së Evropës mes PSG dhe Aston Villa.
Ndeshja do të luhet më 12 gusht në Salzburg të Austrisë, ndërsa UEFA ka vendosur t’i besojë 34-vjeçarit drejtimin e finales, në kuadër të marrëveshjes së bashkëpunimit mes UEFA-s dhe Konfederatës Afrikane të Futbollit.
“Futbolli bashkon njerëzit dhe UEFA dëshiron të tregojë respektin e saj për Omar dhe punën e tij të jashtëzakonshme si arbitër”, u shpreh presidenti i UEFA-s, Aleksander Ceferin.
Artan u shpall vitin e kaluar arbitri më i mirë në Afrikë, çka i siguroi edhe përfshirjen në listën e arbitrave për Botërorin 2026. Megjithatë, atij iu refuzua hyrja në SHBA pas problemeve të konstatuara gjatë procesit të kontrollit të sigurisë.
Qeveria somaleze e cilësoi vendimin si “të keqardhshëm” dhe kërkoi shpjegime nga Uashingtoni dhe FIFA. Ministria e Rinisë dhe Sporteve njoftoi se, së bashku me Ministrinë e Jashtme, po zhvillon përpjekje diplomatike për të marrë një sqarim të qartë mbi rastin.
Në deklaratën e saj, qeveria somaleze theksoi se Artan ka përfaqësuar me dinjitet vendin, profesionin dhe sportin somalez në arenën ndërkombëtare.
Arbitri 34-vjeçar pretendon se kishte vizë të vlefshme, por pas mbërritjes në aeroportin ndërkombëtar të Miamit nuk u lejua të hynte në territorin amerikan dhe më pas u deportua drejt Turqisë.
Sipas raportimeve, administrata amerikane e justifikoi vendimin me dyshime të ngritura gjatë kontrollit të sigurisë, gjë që shkaktoi zemërim të madh në Somali.
Pas kthimit në vendlindje, Artan u prit si hero nga bashkëkombësit e tij dhe u nderua edhe në stadiumin olimpik të vendit.
Tani, pas gjithë kësaj situate, UEFA ka vendosur t’i japë një sinjal të fortë mbështetjeje, duke i besuar gjykimin e një finaleje të rëndësishme evropiane.
