Portugalia fitoi 2-1 ndaj Nigerisë në miqësoren e fundit para nisjes për në Botërorin 2026, por vëmendja në rrjetet sociale shkoi te Cristiano Ronaldo dhe paraqitja e tij jo bindëse.
Sulmuesi portugez nuk kaloi një mbrëmje të mirë para portës, duke humbur disa raste të pastra shënimi dhe duke u kritikuar ashpër nga tifozët në rrjetin X.
“Cristiano Ronaldo sapo humbi rastin më të lehtë që mund të shohësh”, shkroi një përdorues, ndërsa një tjetër ironizoi: “Tha se nëse kujdeset për veten mund të luajë edhe në Botërorin 2030. Mjaft, tërhiqu.”
Ronaldo është përpara Kupës së tij të gjashtë dhe me shumë mundësi të fundit të Botës. Për trajnerin Roberto Martínez, ai mbetet një nga figurat kryesore të Portugalisë, pavarësisht kritikave të fundit.
Në ndeshjen ndaj Nigerisë, Portugalia kaloi në avantazh në minutën e 23-të me Pedro Neto, pas një aksioni të nisur nga Francisco Trincão dhe të finalizuar me asistimin e Diogo Dalot.
Nigeria barazoi në minutën e 38-të me Akor Adams, i cili përfitoi nga një kundërsulm dhe mposhti Diogo Costa. Në pjesën e dytë, Ronaldo qëndroi në fushë deri në minutën e 64-t, por nuk arriti të gjente golin.
Golin e fitores për Portugalinë e shënoi Francisco Conceição në minutën e 75-të, me një goditje të fuqishme nga krahu i djathtë i zonës.
Tani Portugalia do të udhëtojë drejt Botërorit 2026, ku do të jetë në Grupin K së bashku me Kolumbinë, Uzbekistanin dhe Kongon.
