Hakan Çalhanoglu mbetet sërish në qendër të zërave të merkatos në Turqi, por Inter nuk ka ndërmend ta lejojë largimin e mesfushorit.
Klubet e Stambollit vazhdojnë ta ndjekin me interes kapitenin e kombëtares turke, ndërsa së fundmi Fenerbahçe u përfol si një mundësi konkrete. Megjithatë, situata ka ndryshuar pas zgjedhjeve presidenciale në klubin turk, ku kandidati Hakan Safi, i cili kishte folur hapur për afrimin e Çalhanoglu, nuk arriti të fitonte.
Te Inter e kanë bërë të qartë qëndrimin e tyre: Çalhanoglu ka kontratë dhe klubi dëshiron ta mbajë. Drejtori sportiv Piero Ausilio foli me ironi për zërat nga Turqia, duke theksuar se mesfushori është pjesë e rëndësishme e projektit zikaltër.
“Ka një problem të vogël: Çalhanoglu ka kontratë dhe Inter dëshiron ta mbajë. Nuk mendoj se deklaratat e kandidatëve presidencialë do të kenë ndonjë vazhdim”, u shpreh Ausilio.
Çalhanoglu nuk e ka fshehur kurrë dëshirën që një ditë të rikthehet në Turqi si protagonist, por për momentin prioriteti i tij është Kupa e Botës me kombëtaren turke.
Inter, nga ana tjetër, synon të shmangë çdo tension të ri në merkato dhe në muajt e ardhshëm do të kuptohet nëse ka hapësirë për rinovimin e kontratës, për të mos rrezikuar një largim falas në vitin 2027.
