Të paktën 12 persona janë qëlluar me armë në një festival komunitar në shtetin amerikan Ohaio, në atë që policia beson se ka qenë një shkëmbim zjarri mes disa personave.
Oficerët janë ende në kërkim të të dyshuarve, ndërsa dy nga të plagosurit raportohet se janë në gjendje kritike pas incidentit në Toledo. Zëvendësshefi i policisë së qytetit, Joe Heffernan, tha se të paktën dy persona ishin të përfshirë dhe “me shumë gjasë po qëllonin njëri-tjetrin” gjatë incidentit të së shtunës.
Video në rrjetet sociale tregonin njerëz duke vrapuar për t’u strehuar dhe shërbime emergjente që po u jepnin ndihmë viktimave në vendngjarje.
Kevin Berry tha se po dëgjonte muzikë live në Agnes Reynolds Jackson Arboretum kur u dëgjuan të shtënat dhe “të gjithë u shtrinë përtokë”.
Ai pa një armë që u hodh në tokë ndërsa policia mbërriti me shpejtësi dhe përshkroi të paktën pesë persona me plagë nga plumbat “të shpërndarë rreth zonës së arboretumit”.
Sipas policisë, të plagosurit janë të moshave nga 14 deri në 61 vjeç. Kryebashkiaku i Toledos, Wade Kapszukiewicz, tha se pritet që të gjithë të mbijetojnë, edhe pse dy prej tyre vazhdojnë të jenë në gjendje kritike.
Festivali “Old West End” konsiderohet një nga aktivitetet më të mëdha vjetore në Toledo dhe çdo vit tërheq mijëra vizitorë.
