Shqipëria ka pësuar humbjen e dytë radhazi në miqësoret e qershorit, duke u mundur 0-1 nga Luksemburgu. Pas disfatës me të njëjtin rezultat ndaj Izraelit, kuqezinjtë nuk arritën të reagonin as në testin e dytë nën drejtimin e trajnerit Rolando Maran.
Në një stadium me pak prani tifozësh, Kombëtarja zhvilloi një paraqitje të zbehtë dhe u ndëshkua që në minutën e 8-të. Aimar Dardari kaloi me lehtësi mbrojtjen kuqezi dhe asistoi për Daniel Sinani, i cili dërgoi topin në rrjetë për avantazhin e Luksemburgut.
Pas golit, Shqipëria tentoi të reagojë, por pa krijuar raste të pastra dhe të rrezikshme. Pjesa e parë u mbyll 0-1, me kuqezinjtë që vuajtën në ndërtimin e lojës dhe në krijimin e mundësive konkrete.
Maran e nisi pjesën e dytë me disa ndryshime, duke aktivizuar Ajetin, Shehun, Spendin dhe Seferin në vend të Pllanës, Laçit, Ramadanit dhe Bajramit. Megjithatë, edhe lëvizjet nga stoli nuk sollën kthesën e pritur.
Në minutën e 57-të, Asllani provoi një goditje spektakolare nga mesfusha, por pa sukses. Më pas u aktivizuan edhe Broja, Pajaziti dhe Daku, por Shqipëria nuk arriti të ndryshojë ritmin e ndeshjes.
Në krahun tjetër, Luksemburgu pati mundësi për të dyfishuar avantazhin, por Alen Sherri u tregua vendimtar në disa raste, duke shmangur një humbje më të thellë.
Ndeshja u mbyll 0-1 për Luksemburgun, ndërsa Maran mbetet ende në kërkim të fitores së parë në krye të Kombëtares shqiptare.
Rezultati:
Shqipëri 0-1 Luksemburg
Sinani 8’
