Michael Olise është një nga emrat më të nxehtë të merkatos europiane. Ylli i Bayern Munich ka bërë një ngjitje të jashtëzakonshme në dy vitet e fundit, duke kaluar nga një lojtar pak i njohur në një nga futbollistët më të kërkuar nga klubet e mëdha.
Sipas raportimeve nga Spanja, Florentino Pérez po përgatit një ofertë prej 150 milionë eurosh për francezin, nëse rizgjidhet president i Real Madrid. Nëse marrëveshja realizohet, Olise do të bëhej transferimi më i shtrenjtë në historinë e klubit madrilen.
Bayern e bleu nga Crystal Palace në vitin 2024 për 53 milionë euro, një shifër që sot duket si një goditje e madhe, duke parë nivelin që lojtari ka arritur në Gjermani.
Historia e Olise është edhe më interesante, pasi ai është formuar në Angli dhe ka kaluar në akademitë e Chelsea, Arsenal dhe Manchester City, por asnjë prej tyre nuk vendosi të besonte tek ai. Më pas ai shpërtheu te Reading, u konfirmua te Crystal Palace dhe tani është kthyer në një yll te Bayern.
Olise ka katër kombësi: nigeriane nga babai, franceze dhe algjeriane nga nëna, si dhe angleze për shkak të vendlindjes. Anglia tentoi ta bindte të luante për “Tre Luanët”, por dëshira e tij për të përfaqësuar Francën ishte më e fortë.
Këtë sezon, anësori i Bayern ka regjistruar 22 gola dhe 31 asistime në të gjitha kompeticionet, duke u kthyer në një nga lojtarët më vendimtarë në Europë.
Megjithatë, transferimi te Real Madrid nuk pritet të jetë i thjeshtë. Bayern është një klub i fortë financiarisht dhe nuk ka nevojë të shesë, ndërsa për ta hapur derën e largimit, lojtari duhet të tregojë qartë dëshirën për t’u transferuar.
Për momentin, Olise është një nga emrat që Florentino ka në mendje për të ndërtuar Real Madrid e ri. Një lojtar i heshtur jashtë fushe, por spektakolar me topin në këmbë.
