Carlo Ancelotti mbetet optimist për gjendjen e Neymar, teksa Brazili po përgatitet për Kupën e Botës 2026. Sulmuesi brazilian po rikuperohet nga një dëmtim në pulpë dhe pritet t’i nënshtrohet një rezonance magnetike të hënën.
Trajneri i Brazilit konfirmoi se Neymar po punon shumë mirë individualisht dhe, nëse kontrollet mjekësore japin sinjale pozitive, ai mund të rikthehet në stërvitje me grupin javën e ardhshme.
“Mendoj se situata e tij është shumë e qartë. Neymar po bën një punë individuale të shkëlqyer. Pas fundjavës do të bëjë rezonancën dhe nëse gjithçka shkon mirë, mund të stërvitet me skuadrën javën e ardhshme”, u shpreh Ancelotti.
Braziliani pritet të mungojë në miqësoren ndaj Egjiptit, ndërsa Ancelotti do ta përdorë këtë test për të provuar disa zgjidhje taktike para nisjes së Botërorit.
Trajneri italian konfirmoi gjithashtu se Gabriel Magalhaes nuk do të luajë për shkak të lodhjes fizike, ndërsa Douglas Santos do ta nisë si titullar në krahun e majtë të mbrojtjes.
Brazili do të debutojë në Grupin C ndaj Marokut më 13 qershor, ndërsa Neymar mbetet në garë me kohën për të qenë gati për turneun.
