Kryeministri Edi Rama ka reaguar pas ngjarjes së rëndë në Lozhan të Maliqit, ku gjatë një operacioni policor humbi jetën efektivi Enea Mekolli, ndërsa u plagos kolegu i tij, Edison Adri.
Përmes një reagimi publik, Rama vlerësoi operacionin e Policisë së Shtetit dhe sakrificën e efektivit të rënë në krye të detyrës.
“Gjatë një operacioni kurajoz për kapjen e një të shumëkërkuari, që prej vitesh i fshihej ligjit në malet e Korçës dhe në mënyrë të përsëritur kishte arritur t’u ikte rrethimeve të forcave të rendit, ka humbur jetën një efektiv policie e është plagosur një i dytë, ndërkohë që pasi ka hapur zjarr ndaj tyre u plagos dhe u kap edhe krimineli!
Nderim përjetë dëshmorit të atdheut, ngushëllime familjes dhe shërim të shpejtë efektivit tjetër.
Ndëshkim maksimal për të shumëkërkuarin dhe respekt maksimal për Policinë e Shtetit, që nuk do të ndalet asnjëherë në misionin e saj”, shkroi Rama.
Ngjarja ndodhi gjatë një operacioni për kapjen e të shumëkërkuarit Violand Braçellari në zonën e Lozhanit. Sipas informacioneve paraprake, gjatë ndërhyrjes ai dyshohet se ka qëlluar me armë zjarri ndaj efektivëve, duke lënë të vrarë Enea Mekollin dhe duke plagosur Edison Adrin. Vetë Braçellari mbeti i plagosur dhe u vu në pranga nga forcat e policisë.
