Rolando Maran nuk ka arritur ta nisë me rezultat pozitiv aventurën në krye të Kombëtares shqiptare. Kuqezinjtë u mundën 0-1 nga Izraeli në miqësoren e zhvilluar në “Air Albania”.
Shqipëria e nisi ndeshjen me intensitet dhe presing, duke kërkuar të vendoste menjëherë kontrollin e lojës. Rasti i parë i mirë erdhi në minutën e 10-të, kur Anis Mehmeti provoi pas një krosimi nga Hysaj, por goditja e tij përfundoi mbi traversë.
Kuqezinjtë patën edhe disa tentativa të tjera gjatë pjesës së parë, kryesisht me Asllanin, Mehmetin dhe Hoxhën, por pa arritur të gjenin rrugën e rrjetës. Nga ana tjetër, Izraeli u shfaq i rrezikshëm me Gloukh, por edhe ai nuk arriti të shënonte në 45 minutat e para.
Në pjesën e dytë, Izraeli rriti ritmin dhe iu afrua golit me Solomon, por portieri Sherri ishte vendimtar, duke mbajtur të paprekur portën kuqezi në disa momente të vështira.
Shqipëria pati një mundësi të mirë në minutën e 67-të, kur një aksion i Hoxhës nga krahu i majtë për pak sa nuk solli autogol nga mbrojtja izraelite.
Goli vendimtar erdhi në minutën e 73-të. Gloukh përfitoi nga një kundërsulm dhe me një goditje të saktë me të majtën mposhti Sherrin, duke i dhënë Izraelit avantazhin 0-1. Pas golit pati edhe tension mes autorit të golit dhe Hysajt, me të dy lojtarët që u ndëshkuan me karton të verdhë.
Në minutat e fundit, Sherri ishte sërish protagonist, duke ndalur një tjetër tentativë të rrezikshme të Abed dhe duke shmangur golin e dytë.
Shqipëria nuk arriti të reagojë deri në fund, ndërsa ndeshja u mbyll me fitoren minimale të Izraelit. Tashmë Kombëtarja do të përqendrohet te miqësorja e radhës ndaj Luksemburgut, ku Maran do të kërkojë suksesin e parë në stolin kuqezi.
Rezultati:
Shqipëri 0-1 Izrael
Gloukh 73’
