Ibrahima Konaté ka bërë një rrëfim të ndjerë gjatë një interviste për France Inter, teksa ndodhet i grumbulluar me Kombëtaren e Francës para nisjes së Kupës së Botës.
Mbrojtësi i Liverpool tregoi se sezoni i kaluar ka qenë shumë i vështirë për të në aspektin emocional, pas humbjes së babait në janar dhe vdekjes tragjike të Diogo Jota në një aksident automobilistik.
Duke folur për Jota, Konaté tha se lajmi e kishte tronditur thellë. Ai kujtoi se ndodhej në Los Angeles kur e mori vesh dhe se nuk mund ta besonte atë që kishte ndodhur.
“Më shkatërroi. Në atë moment nuk më interesonte asgjë tjetër. Ai ishte personi i fundit që do të mendoje se mund t’i ndodhte diçka e tillë. Donte thjesht të ishte i lumtur, të kalonte mirë me shokët e skuadrës dhe familjen”, u shpreh Konaté.
Francezi foli edhe për humbjen e babait, shëndeti i të cilit ishte përkeqësuar që nga fillimi i sezonit. Ai pranoi se në atë periudhë nuk dinte nëse duhej të ndalonte së luajturi apo të vazhdonte, pasi edhe skuadra kishte nevojë për të.
Konaté tregoi se nuk kishte folur me askënd për gjendjen e tij mendore, por tani i këshillon të tjerët të mos i mbajnë brenda vështirësitë.
“Kur nuk ndihesh mirë, duhet të flasësh me njerëzit pranë teje. Mund të të ndihmojë dhe të të bëjë të ndihesh më mirë”, tha mbrojtësi.
Ky rrëfim ka marrë shumë vëmendje në Francë, vetëm pak ditë para nisjes së Kupës së Botës.
