Krimi Ekonomik pranë Policisë së Tiranës ka goditur një skemë të dyshuar abuzimi me fondet e klientëve në një bankë të nivelit të dytë në kryeqytet, duke arrestuar dy punonjës dhe duke vendosur masën e sigurisë “arrest në shtëpi” për gjashtë të tjerë. Ndërkohë, katër punonjës janë pezulluar nga detyra.
Operacioni u zhvillua pas denoncimeve të disa qytetarëve, të cilët konstatuan se shumat e parave që duhej të ndodheshin në llogaritë e tyre mungonin.
Sipas hetimeve paraprake, dyshohet se punonjësit kanë bashkëpunuar me njëri-tjetrin për të përvetësuar fondet e klientëve të bankës. Deri më tani, dëmi i dokumentuar llogaritet në mbi 200 mijë euro.
Autoritetet po vijojnë hetimet për të identifikuar raste të tjera të mundshme, pasi dyshohet se numri i klientëve të prekur nga kjo skemë është i konsiderueshëm.
