Real Madrid po monitoron mbrojtësin e djathtë të Inter, Denzel Dumfries, si një nga opsionet kryesore për të zëvendësuar Dani Carvajal në skuadër.
Futbollisti holandez, i cili së fundmi mbushi 30 vjeç, vlerësohet për eksperiencën, forcën fizike dhe aftësinë për t’u përshtatur në role të ndryshme në krahun e djathtë. Emri i Pedro Porro është përmendur gjithashtu, por ai konsiderohet një alternativë më e shtrenjtë dhe më e vështirë për t’u transferuar.
Dumfries ka një klauzolë largimi prej 25 milionë eurosh, shumë që shihet si e përballueshme për një lojtar titullar te një klub i madh europian dhe pjesë e rëndësishme e Kombëtares së Holandës.
Sipas raportimeve, opsioni i Dumfries i është prezantuar Mourinho, i cili ka dhënë miratimin e tij. Trajneri e vlerëson për përmirësimin në fazën defensive gjatë viteve në Serie A, si dhe për disiplinën dhe përshtatjen me kërkesat e një kampionati shumë taktik.
Megjithatë, zgjedhjet presidenciale te Real Madrid kanë lënë disa operacione merkatoje në pritje. Vendimi final për Dumfries do të varet nga rezultati i zgjedhjeve dhe nga drejtimi që do të marrë klubi pas tyre.
Në Itali raportohet se mbrojtësi i Inter do të ishte i gatshëm të largohej nga zikaltërit për t’iu bashkuar Real Madrid, nëse klubi spanjoll vendos të bëjë lëvizjen konkrete.
