Në një kohë kur shumë njerëz mendojnë për pensionin dhe pushimin nga aktivitetet e përditshme, një grua 108-vjeçare nga Shtetet e Bashkuara po vazhdon të drejtojë automjetin dhe sapo ka rinovuar patentën e saj deri në vitin 2033.
Susan Young Browne, e lindur në vitin 1918, është kthyer në një shembull frymëzues të jetëgjatësisë dhe energjisë. Ajo ka marrë lejen për të vazhduar drejtimin e automjetit edhe për disa vite të tjera, duke e çuar vlefshmërinë e patentës deri kur ajo të jetë 115 vjeç.
Gjatë një interviste, Browne tregoi se nuk ka ndonjë formulë magjike për jetën e gjatë, por beson se aktiviteti fizik i rregullt ka luajtur një rol vendimtar në shëndetin e saj.
“Po plakem me dinjitet”, tha ajo, ndërsa zbuloi se tri herë në javë merr pjesë në aktivitete dhe ushtrime fizike në një qendër për të moshuar. “Kur zgjohem në mëngjes, kam një rutinë ushtrimesh që e ndjek prej 20 vitesh. Pasi kalova 30 vjet duke ecur nëpër klasë si mësuese, nuk do të rrija ulur pas daljes në pension”, u shpreh 108-vjeçarja.
Jeta e saj ka qenë e mbushur me sfida. Ajo u rrit dhe punoi në një fermë ku nuk kishte ujë të rrjedhshëm dhe as energji elektrike. Më vonë vazhdoi studimet e larta dhe u diplomua në vitin 1945. Për më shumë se tre dekada punoi si mësuese, fillimisht në një shkollë rurale me një klasë të vetme dhe më pas në institucione të tjera arsimore.
Historia e saj ka tërhequr vëmendjen e komunitetit lokal. Në festën e 108-vjetorit të lindjes morën pjesë rreth 130 persona, mes tyre edhe guvernatori i Delaware, Matt Meyer.
Një nga dhuratat më të veçanta që mori ishte një vend parkimi i rezervuar posaçërisht për të pranë qendrës që frekuenton. Gjesti mori një domethënie të veçantë pasi pak ditë më parë autoritetet i kishin rinovuar patentën e drejtimit, duke i lejuar të vazhdojë të ngasë makinën edhe në vitet e ardhshme.
