La Liga pritet të ketë një merkato shumë të nxehtë këtë verë, me shpenzimet për transferime që mund të kalojnë shifrën e 800 milionë eurove.
Real Madrid, Barcelona dhe Atlético Madrid pritet të jenë protagonistët kryesorë të merkatos, me tre gjigantët spanjollë që kanë hapësirë financiare për të bërë investime të rëndësishme në skuadrat e tyre.
Barcelona synon të rikthehet fuqishëm në treg, pas disa viteve të kufizuara nga problemet financiare. Largimi i Lewandowski, të ardhurat nga Camp Nou dhe shitjet e zonave VIP pritet t’i japin klubit mundësinë të arrijë rregullin 1:1, duke i lejuar katalanasit të lëvizin më lirshëm në merkato.
Anthony Gordon shihet si një nga shembujt e parë të kësaj rikthimi, me një operacion që mund të kapë 70 milionë euro plus bonuse. Ndërkohë, në horizont mbetet edhe emri i Julián Álvarez, një tjetër objektiv i madh për skuadrën e Hansi Flick.
Edhe Real Madrid pritet të jetë shumë aktiv. Madrilenët kanë mundësi të investojnë 150 deri në 200 milionë euro, nëse e shohin të nevojshme. Klubi ka nevojë për përforcime në mbrojtje dhe mesfushë, sidomos me zgjedhjet në prag dhe me ardhjen e një trajneri të ri.
Atlético Madrid do të jetë gjithashtu pjesë e rëndësishme e merkatos. Me fondin Apollo në skenë, klubi madrilen pritet të vazhdojë linjën e investimeve, por pa lëvizje të çmendura. Objektivi është të shpenzojë me kujdes dhe të ndërtojë një skuadër konkurruese, sidomos pas largimit të Griezmann dhe pasigurisë rreth Julián Álvarez.
Megjithatë, jo të gjitha klubet spanjolle do ta kenë të lehtë. Skuadrat më të vogla pritet të vuajnë nga rritja e çmimeve në treg, e ndikuar sidomos nga fuqia financiare e Premier League. Drejtuesit e La Liga kanë paralajmëruar se shpenzimet e klubeve angleze mund të krijojnë një “flluskë” që do të prekë edhe kampionatin spanjoll.
Në këtë panoramë, merkatoja e verës pritet të kthehet në një garë të madhe mes Barcelonës, Real Madrid dhe Atlético Madrid, me tre klubet që do të përcaktojnë ritmin e transferimeve në Spanjë.
