Luka Modric mund të jetë shumë pranë fundit të karrierës si futbollist profesionist. Sipas raportimeve nga Italia, mesfushori kroat po mendon të tërhiqet pas Kupës së Botës, ndërsa eliminimi i Milanit nga gara për Champions League duket se ka përshpejtuar vendimin e tij.
Humbja e kuqezinjve ndaj Cagliari ka lënë pasoja të mëdha te klubi, por edhe te vetë Modric. Kroati kishte vendosur si kusht qëndrimin e Milanit në Champions League për të vazhduar aventurën në “San Siro”, por objektivi nuk u arrit.
Sipas gazetarit Nicolo Schira, Modric ka reflektuar gjatë për të ardhmen dhe për momentin vazhdimi i karrierës nuk duket më si opsioni kryesor. Kontrata e tij është pranë skadimit, ndërsa Milan ende po përpiqet ta bindë të qëndrojë.
Situata te klubi ka ndryshuar ndjeshëm pas dështimit në kampionat. RedBird ka njoftuar largimin e drejtuesve dhe të trajnerit Massimiliano Allegri, ndërsa vetëm Zlatan Ibrahimovic ka mbetur në rolin e tij.
Për Modric, largimi nuk do të ishte i lehtë. Në moshën 40-vjeçare, ai kishte gjetur stabilitet në Milano, ishte ende një lojtar i rëndësishëm për skuadrën dhe gëzonte mbështetjen e tifozëve. Edhe familja e tij ishte përshtatur me jetën në qytetin italian.
Tani fokusi i kroatit është te Kupa e Botës. Modric pritet t’i bashkohet Kroacisë për turneun që do të zhvillohet në Meksikë, Shtetet e Bashkuara dhe Kanada. Para debutimit ndaj Anglisë më 17 qershor, Kroacia do të luajë miqësore me Slloveninë dhe Belgjikën.
Ndeshjet ndaj Anglisë, Panamasë dhe Ganës në fazën e grupeve mund të jenë të fundit në karrierën e jashtëzakonshme të Luka Modric.
