Të paktën një person ka humbur jetën dhe nëntë të tjerë rezultojnë ende të zhdukur pas një shpërthimi në një fabrikë letre në Uashington, në SHBA, thanë autoritetet lokale.
Shpërthimi ndodhi rreth orës 07:15 me kohën lokale në fabrikën Nippon Dynawave Packaging në qytetin Longview, rreth 210 kilometra në jug të Seattle.
Sipas Departamentit të Zjarrfikësve të Longview, edhe nëntë persona të tjerë janë plagosur, përfshirë tetë punonjës dhe një zjarrfikës. Autoritetet paralajmëruan se rezervuari i dëmtuar mbetet ende i paqëndrueshëm dhe paraqet rrezik për ekipet e emergjencës.
Shefi i zjarrfikësve të qarkut, Scott Goldstein, tha se disa prej të plagosurve janë në gjendje të rëndë.
Autoritetet thanë se situata është nën kontroll, por qytetarëve u është kërkuar të shmangin zonën ndërsa vazhdojnë operacionet e emergjencës dhe përforcimi strukturor i vendit të aksidentit.
Objekti prodhon letra higjienike, letër printeri, gota, pjata dhe produkte të tjera prej letre, ndërsa punëson rreth 1,000 persona.
