Pep Guardiola ka mbyllur me emocione të mëdha aventurën e tij 10-vjeçare te Manchester City. Trajneri spanjoll pranoi se ndihet “shumë i lodhur” pas ndeshjes së fundit në krye të skuadrës, të humbur 2-1 ndaj Aston Villa.
Pas vërshëllimës finale, Guardiola nuk i mbajti dot lotët, sidomos kur pa Bernardo Silva të përlotur. Kjo ishte edhe ndeshja e fundit për disa figura të rëndësishme të klubit, përfshirë Bernardo Silva dhe John Stones.
Manchester City kaloi i pari në avantazh me Antoine Semenyo, por Aston Villa e Unai Emery përmbysi gjithçka në pjesën e dytë falë dy golave të Ollie Watkins, duke prishur festën e lamtumirës në “Etihad”.
“Nuk qaj zakonisht, por kur pashë Bernardo duke qarë, qava edhe unë. I thashë të mos qante, por ndodhi. Ishte një moment shumë i veçantë. Emocionet ishin shumë të mëdha dhe nuk do ta harroj kurrë”, u shpreh Guardiola.
Trajneri spanjoll foli hapur edhe për lodhjen pas një dekade historike te Manchester City.
“Jam shumë i lodhur. Seriozisht, jam shumë i lodhur. Kam dhënë gjithçka. E bëmë. Kujtimet që kam nga Barcelona dhe Bayern Munich janë të jashtëzakonshme, por kujtimet që marr nga këto 10 vite këtu janë më shumë se kudo tjetër”, tha ai.
Guardiola theksoi se për të, lidhjet njerëzore kanë qenë më të rëndësishme se trofetë. Gjatë periudhës së tij te City, ai fitoi 20 trofe, përfshirë gjashtë tituj të Premier League, një Champions League, tre FA Cup dhe pesë League Cup.
Pavarësisht emocioneve, Guardiola këmbënguli se largimi tani është vendimi i duhur për klubin dhe lojtarët.
“Është momenti i duhur. Nuk do të më mungojë për një kohë, kjo është e sigurt. E ndiej thellë se ky është vendimi i duhur për klubin dhe për lojtarët. Falënderoj klubin që e respektoi vendimin tim”, deklaroi ai.
Tani Guardiola pritet të marrë një pushim të gjatë nga futbolli, pas një periudhe të jashtëzakonshme, por edhe shumë të lodhshme në krye të Manchester City.
