Mohamed Salah ka shkruar një tjetër faqe të rëndësishme në historinë e Liverpool. Sulmuesi egjiptian ka kaluar Steven Gerrard dhe është bërë lojtari me më shumë asistime për “The Reds” në historinë e Premier League.
Në barazimin 1-1 ndaj Brentford, Salah dhuroi një moment klasi, duke asistuar Curtis Jones me një pasim të bukur me pjesën e jashtme të këmbës. Jones e kishte të lehtë ta dërgonte topin në rrjetë, ndërsa Salah arriti në kuotën e 93 asistimeve në Premier League me fanellën e Liverpool.
Ky asist ishte i mjaftueshëm që egjiptiani të kalonte Gerrard, i cili kishte 92 asistime në elitën e futbollit anglez për klubin nga Anfield.
Salah u zëvendësua në minutën e 74-të nga Jeremie Frimpong dhe mori duartrokitje të mëdha nga tifozët, në atë që mund të konsiderohet si një mbyllje emocionuese e aventurës së tij te Liverpool.
Gjatë periudhës së tij me “The Reds”, Salah ka lënë një trashëgimi të jashtëzakonshme. Ai ka luajtur 442 ndeshje, ka shënuar 257 gola dhe ka fituar trofe të mëdhenj, përfshirë Premier League dhe Champions League.
E ardhmja e “Mbretit Egjiptian” mbetet ende e paqartë, pasi ai pritet të largohet si lojtar i lirë. Për momentin, fokusi i tij do të jetë te Kupa e Botës me Egjiptin, ndërsa më pas do të vendosë për hapin e radhës në karrierë.
