Milani ka përjetuar një nga mbrëmjet më të dhimbshme të sezonit, duke humbur në San Siro ndaj Cagliari dhe duke i dhënë lamtumirën objektivit kryesor: kualifikimit në Champions League.
Skuadra e Allegrit e nisi ndeshjen në mënyrën më të mirë, me Saelemaekers që shënoi pas më pak se dy minutash lojë. Por avantazhi nuk zgjati shumë, pasi Cagliari mori kontrollin dhe barazoi me Borrelli në minutën e 20-të.
Në pjesën e dytë, sardët goditën sërish. Rodriguez shënoi me kokë pas një aksioni të çrregullt në zonë, duke vulosur përmbysjen dhe duke zhytur Milanin në një krizë të thellë.
Hyrjet e Pulisic, Modric dhe Leao nuk ndryshuan asgjë. Kuqezinjtë tentuan të reagonin, por krijuan shumë pak dhe në fund u shoqëruan nga fishkëllimat e tifozëve në San Siro.
Kjo humbje e lë Milanin jashtë Champions League, me skuadrën që pritet ta mbyllë sezonin në vendin e pestë ose të gjashtë. Një dështim i rëndë për një ekip që për pjesën më të madhe të sezonit kishte qenë në zonën e katër vendeve të para.
