I dërguari i Bashkimit Evropian për dialogun Kosovë-Serbi, Miroslav Lajçak, ka zhvilluar një takim ditën e djeshme me presidentin serb, Aleksandar Vuçiç. Përmes një postimi në rrjetin e tij social X, Lajçak ka zbuluar se me Vuçiç është folur për gjendjen në dialog.
Lajçak ka shtuar se gjatë takimit, ai ka theksuar se Marrëveshja e Ohrit e vitit 2023 hapi rrugën përpara drejt normalizimit. Ai është shprehur se progresi është në interes të Serbisë, Kosovës dhe Bashkimit Evropian.
“Në takimin tonë të fundit në rolin tim aktual me presidentin Aleksandar Vuçiç fola për gjendjen në dialog. Theksova se Marrëveshja e Ohrit e vitit 2023 hapi rrugën përpara drejt normalizimit. Progresi i mëtejshëm është në interes të Serbisë, Kosovës, Bashkimit Evropian dhe të ardhmes së tyre”, është shprehur ai në rrjetin social X.
Edhe presidenti i Serbisë, Aleksandar Vuçiç, ka njoftuar se në kuadër të Forumit Ekonomik në Davos të Zvicrës me Lajçakun ka diskutuar për të ardhmen e dialogut. Vuçiç ka shtuar se ka përsëritur thirrjen për BE-në për të forcuar angazhimin dhe ndikimin e tyre në Kosovë.
“Falënderova Përfaqësuesin Special të BE-së për bashkëpunimin e mëparshëm dhe i urova fat në karrierën e tij të ardhshme. Në të njëjtën kohë, përsërita thirrjen time për BE-në dhe shtetet anëtare për të forcuar angazhimin dhe ndikimin e tyre në Kosovë, dhe për t’i siguruar popullit serb në Kosovë të drejtën për jetë të lirë, drejtësi dhe zë”, ka shkruar Vuçiç në rrjetin social Facebook.
