Michael Carrick e ka cilësuar merkaton e ardhshme të verës si një nga periudhat më të rëndësishme për Manchester United, teksa kërkon ta kthejë skuadrën në pretendente serioze për titullin në Premier League.
Trajneri i “Djajve të Kuq” ka siguruar kualifikimin në Champions League dhe tashmë, me kontratë të përhershme në Old Trafford, përballet me një verë vendimtare për rindërtimin e skuadrës.
Carrick ka pranuar se United ka bërë hapa përpara këtë sezon, por ka ende shumë punë për të ngushtuar diferencën me skuadrat kryesore të Premier League. Largimi i disa lojtarëve me eksperiencë, përfshirë Casemiro, pritet të krijojë nevojë për ndryshime të rëndësishme në grup.
“Çdo merkato duket si më e rëndësishmja e të gjitha kohërave për çdo klub. Kjo është natyra e futbollit sot. Si klub, ne duam të vazhdojmë të ecim përpara dhe është e qartë se kemi punë për të bërë”, ka thënë Carrick.
Trajneri anglez theksoi se ekuilibri i skuadrës duhet të përmirësohet, sidomos në një moment kur United kërkon të kalojë nga një sezon pozitiv në një projekt më të qëndrueshëm për të luftuar në nivelet më të larta.
Carrick foli edhe për rritjen e lojtarëve të rinj, duke theksuar se disa prej tyre kanë fituar më shumë siguri, karakter dhe personalitet gjatë sezonit. Sipas tij, lidershipi nuk shfaqet vetëm me fjalë, por edhe me sjellje, paraqitje dhe aftësinë për të përballuar presionin.
Manchester United do ta mbyllë sezonin ndaj Brighton, përpara se vëmendja të kalojë plotësisht te merkatoja e verës. Emra si Elliot Anderson, Carlos Baleba dhe Sandro Tonali janë përmendur si objektiva të mundshëm për “Djajtë e Kuq”.
