Thomas Tuchel pritet të bëjë ndryshime të mëdha në listën e Anglisë për Botërorin 2026. Trajneri gjerman do të publikojë listën zyrtare të premten, por disa emra të rëndësishëm pritet të mungojnë.
Sipas raportimeve nga Anglia, Phil Foden, Cole Palmer, Adam Wharton, Luke Shaw dhe Fikayo Tomori nuk do të jenë pjesë e skuadrës për turneun e madh.
Një tjetër mungesë e rëndësishme është Harry Maguire, i cili reagoi publikisht pas lajmit se nuk do të grumbullohet. Mbrojtësi i Manchester United u shpreh i zhgënjyer nga vendimi, duke theksuar se besonte se mund të kishte një rol të rëndësishëm për kombëtaren.
“Isha i sigurt se mund të luaja një rol të rëndësishëm për vendin tim këtë verë pas sezonit që kam bërë. Jam i shokuar dhe i shkatërruar nga ky vendim”, shkroi Maguire në rrjetet sociale.
Maguire ka qenë për shumë vite pjesë e rëndësishme e Anglisë, sidomos në Botërorin 2018, ku kombëtarja arriti deri në gjysmëfinale. Megjithatë, Tuchel ka vendosur të mos e përfshijë në planet e tij.
Edhe mungesa e Phil Foden shihet si një surprizë e madhe, duke qenë se mesfushori i Manchester City u shpall lojtari më i mirë i Premier League vetëm dy sezone më parë.
Tuchel duket se po përgatit një rinovim të madh të skuadrës angleze për Botërorin, duke lënë jashtë disa nga emrat më të njohur të viteve të fundit.
