Në seancën e sotme plenare, deputeti i Lëvizjes Bashkë Redi Muçi, kërkoi nga qeveria që të thirrej në mënyrë “urgjente” ambasadori i Izraelit në vendin tonë, te jepte sqarime lidhur me ndalimin e aktivistit shqiptar Baki Goxhaj, i cili u ndalua nga autoritetet izraelite teksa ndodhej në flotiljen “Sumud”, që kishte si mision dërgimin e ndihmave humanitare drejt Gazës.
“Pse heshtni ju të nderuar kolegë, për faktin që një shtetas shqiptar është marrë peng nga një regjim gjenocidial dhe mbahet në kampe torturash nga ministri fashist Ben Gvir. Si ka mundësi që nuk reagoni. Çfarë do ndodhte nëse do merrej peng në Detin Mesdhe nga rusët apo iranianët? A do nënshkruhej atëherë rezoluta për t’i shpallur shtet terrorist? Si ka mundësi që heshtrni?”, tha Muçi.
Ai shtoi se Baki Goxhaj është “ambasadori më i mirë i vlerave shqiptare nëpër botë sot.”
“Nuk ka pse të kërkojmë me kortezi nga qeveria izraeliane çfarë po ndodh me të, por duhet që ministria e jashtme të thërritet menjëherë ambasadori izraelian për krimet që po ndodhin në Gaza dhe trajtimit që i ka bërë shtetasit shqiptar.”, përfundoi Muçi.
