Një ngjarje tragjike ka tronditur Italinë ku një vajzë 2-vjeçare raportohet se është përplasur për vdekje aksidentalisht me makinë nga babai i saj në oborrin e shtëpisë së tyre.
Sipas mediave vendase mësohet se tragjedia ka ndodhur mëngjesin e sotëm në Bollengo, pranë Ivreas në Torino.
Bëhet fjalë për vogëlushen shqiptare, Elodie Kullafi, e cila u përplas nga babai i saj, 29-vjeçari Intrit Kullafi, i cili po lëvizte makinën mbrapsht në oborr për të dërguar të bijën në çerdhe.
Pavarësisht se prindërit e dërguan menjëherë drejt spitalit në Ivrea për të marrë ndihmën e nevojshme mjekësore, por fatkeqësisht 2-vjeçarja nuk arrit të mbijetonte.
Për më shumë se një orë bluzat e bardha u përpoqën që ta mbanin gjallë, por pa sukses.
Autoritetet italiane kanë nisur hetimet për zbardhjen e plotë të tragjedisë që ka tronditur jo vetëm familjen shqiptare, por edhe komunitetin ku ata jetonin prej vitesh.
Mësohet se familja Kullafi ishte e integruar prej kohësh në zonë dhe nuk kishte fëmijë të tjerë.
Në lidhje me ngjarjen e rëndë ka reaguar dhe kryebashkiaku i Bollengos, Luigi Ricca, i cili ka shprehur ngushëllimet për familjen, duke deklaruar se kjo është “një dhimbje për të gjithë komunitetin”.
