Largimi i José Mourinho nga Benfica po shihet gjithnjë e më shumë si i pashmangshëm, ndërsa klubi portugez ka nisur të mendojë për pasuesin e tij.
Sipas Diario AS, duke iu referuar Record, drejtuesit e Benfica po shqyrtojnë seriozisht emrin e Xavi si trajnerin e ri të skuadrës. Ish-trajneri i Barcelona shihet si një kandidat i fortë për të marrë drejtimin e gjigantëve portugezë.
Në garë për stolin e Benfica përmendet edhe Rúben Amorim, ish-trajneri i Manchester United. Megjithatë, fakti që ai ka drejtuar më parë Sporting mund ta bëjë më të vështirë një kalim te rivalët e Lisbonës.
Mourinho pritet të largohet, me Real Madrid që po bën përpjekje për ta rikthyer në Bernabéu. Për këtë arsye, Benfica po përgatitet për një ndryshim të rëndësishëm në stol.
Xavi e ka pasur eksperiencën e fundit si trajner te Barcelona, ku drejtoi skuadrën nga viti 2021 deri në vitin 2024. Në 143 ndeshje me katalanasit, ai regjistroi 91 fitore, 23 barazime dhe 29 humbje.
