Cristiano Ronaldo do të jetë sërish pjesë e Portugalisë në Botëror. Roberto Martínez ka publikuar listën zyrtare të lojtarëve që do të përfaqësojnë kombëtaren portugeze në turneun e vitit 2026, që do të zhvillohet në Shtetet e Bashkuara, Kanada dhe Meksikë.
Për Ronaldo, ky do të jetë Botërori i gjashtë në karrierë, pas pjesëmarrjeve në Gjermani 2006, Afrikë e Jugut 2010, Brazil 2014, Rusi 2018 dhe Katar 2022.
Në moshën 41-vjeçare, ylli portugez vazhdon të shkruajë historinë me kombëtaren. Ai numëron 226 ndeshje dhe 143 gola me Portugalinë, duke mbajtur një rekord të jashtëzakonshëm në nivel ndërkombëtar.
Në pesë Botërorët e mëparshëm, Ronaldo ka shënuar tetë gola dhe tani do të ketë mundësinë ta rrisë këtë shifër në atë që pritet të jetë turneu i tij i fundit i madh me kombëtaren.
Në listën e Portugalisë bie në sy edhe prania e João Félix, i cili është shpërblyer pas një sezoni të mirë me Al-Nassr. Ndërkohë, disa nga mungesat më të rëndësishme janë Antonio Silva, Rodrigo Mora dhe João Palhinha.
Portugalia do të shkojë në Botëror me një grup të fortë lojtarësh, ku përveç Ronaldo janë edhe emra si Bruno Fernandes, Bernardo Silva, Vitinha, Rafael Leão, Gonçalo Ramos, João Cancelo dhe Rúben Dias.
