Një mjet i ri i inteligjencës artificiale po ngjall debat në rrjet: përdoruesit tani mund të rikrijojnë ish-partnerët e tyre dhe të bisedojnë sërish me ta, edhe pas ndarjes.
Sipas raportimeve, shumë persona që po kalojnë periudha të vështira emocionale pas një ndarjeje, po i drejtohen platformave me AI për të rikthyer virtualisht ish-in e tyre.
Një projekt open-source i quajtur “Ex.skill” krijon versione chatbot të ish-partnerëve duke përdorur të dhëna si mesazhe të vjetra, fotografi dhe postime në rrjetet sociale.
Këto versione virtuale mund të flasin, të kujtojnë biseda të kaluara dhe madje të rikrijojnë mënyrën si komunikonte personi real. Zhvilluesit thonë se qëllimi është t’i ndihmojë njerëzit të përballojnë ndarjen, të reflektojnë dhe të gjejnë mundësinë për ta mbyllur shëndetshëm historinë. Po sa e shëndetshme është kjo gjë?
Trendi ka hapur diskutime të forta mbi privatësinë dhe etikën. Ekspertët paralajmërojnë se përdorimi i të dhënave personale për të ndërtuar një kopje dixhitale të dikujt mund të cenojë pëlqimin dhe kufijtë personalë. Po ashtu, psikologët shprehin shqetësim se disa persona mund të krijojnë varësi emocionale ndaj këtyre versioneve artificiale, duke e bërë edhe më të vështirë shkëputjen nga e kaluara.
Fenomeni po shihet si një tjetër shembull se si inteligjenca artificiale po hyn gjithnjë e më thellë në jetën emocionale dhe marrëdhëniet njerëzore.
