Michael Olise është shpallur zyrtarisht lojtari i sezonit 2025/26 në Bundesliga, pas një edicioni fantastik me Bayern Munich.
Francezi 24-vjeçar ka qenë një nga figurat kryesore të bavarezëve gjatë sezonit, duke u kthyer në një nga lojtarët më vendimtarë të kampionatit gjerman.
Çmimi iu dorëzua nga drejtuesit e DFL, Marc Lenz dhe Steffen Merkel, përpara ceremonisë së dorëzimit të trofeut të Bundesliga për Bayern Munich.
Drejtuesit e futbollit gjerman e vlerësuan Olise për dinamizmin, elegancën, vazhdimësinë dhe golat e tij, duke e cilësuar si një nga imazhet kryesore të Bundesliga në nivel kombëtar dhe ndërkombëtar.
Shifrat e tij këtë sezon kanë qenë të jashtëzakonshme. Olise e mbylli kampionatin me 15 gola dhe 19 asistime, duke u bërë lojtari i parë që nga sezoni 2019/20 që arrin të paktën 15 gola dhe 15 asistime në një edicion të vetëm të Bundesliga.
Ky nuk është vlerësimi i parë për Olise që prej transferimit në Gjermani. Në sezonin e tij debutues, ai ishte shpallur edhe “Rookie of the Season”, duke treguar se u përshtat shumë shpejt me futbollin gjerman.
Për çmimin e lojtarit të sezonit, votimi u bë nga tifozët, klubet dhe ekspertët. Olise kishte fituar më parë edhe çmimin e lojtarit të muajit në nëntor dhe janar, ndërsa në fund arriti të linte pas edhe shokun e skuadrës, Harry Kane.
