Robert Lewandowski do të largohet nga Barcelona në fund të sezonit. Sulmuesi polak ka njoftuar zyrtarisht mbylljen e aventurës së tij me katalanasit, pas katër sezoneve të rëndësishme në Camp Nou.
37-vjeçari dha një mesazh emocional lamtumire, duke theksuar se e konsideron të përmbushur misionin e tij te Barcelona. Gjatë kësaj periudhe, Lewandowski ndihmoi klubin të rikthehej në majat e futbollit spanjoll dhe të linte pas një fazë të vështirë.
“Është koha për të vazhduar përpara, misioni u përmbush. Katër sezone, tre tituj kampion. Nuk do ta harroj kurrë dashurinë që më dhanë tifozët. Katalonja do të ketë gjithmonë një vend të veçantë në zemrën time”, shkroi Lewandowski.
Sulmuesi falënderoi gjithashtu presidentin Joan Laporta dhe të gjithë personat që e shoqëruan gjatë kësaj etape, duke e mbyllur mesazhin me fjalët: “Barcelona është kthyer. Visca Barça, Visca Catalunya!”
Lewandowski largohet nga Barcelona me statistika të jashtëzakonshme. Me fanellën blaugrana, ai zhvilloi 190 ndeshje, duke shënuar 119 gola dhe duke dhënë 22 asistime.
Gjatë periudhës së tij te katalanasit, polaku fitoi tre tituj të La Liga, tre Superkupa të Spanjës dhe një Copa del Rey. Në aspektin personal, ai fitoi edhe trofeun Pichichi dhe u përfshi tri herë në ekipin më të mirë të sezonit.
