Michael Carrick mund të marrë zyrtarisht drejtimin e Manchester United si trajner i përhershëm. Klubi po negocion me përfaqësuesit e tij për një kontratë dyvjeçare, me opsion rinovimi edhe për një sezon tjetër.
Vetë Carrick ka pranuar se e ardhmja e tij do të vendoset shumë shpejt. “E ardhmja ime do të vendoset së shpejti. E dinim këtë”, u shpreh ai në konferencën për shtyp në qendrën stërvitore të klubit.
Bisedimet kanë vazhduar pas rekomandimit të shefit ekzekutiv Omar Berrada dhe drejtorit sportiv Jason Wilcox, të cilët kanë propozuar emërimin e Carrick te Sir Jim Ratcliffe.
Shumica e lojtarëve e mbështesin Carrick për postin, ndërsa edhe një pjesë e madhe e tifozëve besojnë se ish-mesfushori e ka merituar mundësinë, pas 10 fitoreve në 15 ndeshje të Premier League si trajner.
Manchester United ka nevojë vetëm për një pikë në dy ndeshjet e fundit për të siguruar vendin e tretë, ndërsa skuadra tashmë ka siguruar kualifikimin në Champions League për sezonin e ardhshëm.
Carrick është përfshirë gjithashtu në listën me gjashtë kandidatë për çmimin “Trajneri i Sezonit” në Premier League.
Trajneri 44-vjeçar konfirmoi se Casemiro do të jetë i gatshëm për ndeshjen ndaj Nottingham Forest, që pritet të jetë edhe përshëndetja e tij e fundit në Old Trafford. Carrick shtoi se pas ndeshjes synon t’u drejtohet tifozëve, duke ndjekur traditën e nisur nga Sir Alex Ferguson.
