Barcelona ka nisur kërkimet për një sulmues të ri për sezonin e ardhshëm, me Joao Pedro të Chelsea që është kthyer në një nga objektivat kryesorë të klubit katalanas.
Drejtori sportiv Deco po punon për të gjetur pasuesin e Robert Lewandowski, i cili raportohet se është pranë një transferimi të mundshëm te Al-Hilal në Arabinë Saudite.
Sipas Globo, Joao Pedro është në krye të listës së dëshirave të Barcelona, së bashku me Julián Álvarez të Atlético Madrid. Pas fitimit të titullit në La Liga, katalanasit duan të përshpejtojnë bisedimet përpara se vëmendja e futbollit të zhvendoset te Botërori.
Megjithatë, operacioni nuk pritet të jetë i lehtë. Chelsea nuk ka ndërmend të heqë dorë lehtë nga sulmuesi brazilian, i cili u transferua nga Brighton për 70 milionë euro dhe ka qenë një nga lojtarët më të rëndësishëm të londinezëve këtë sezon.
Joao Pedro ka zhvilluar një sezon pozitiv në Stamford Bridge, me 23 gola dhe 9 asistime në 51 ndeshje në të gjitha kompeticionet. Ai ka luajtur gjithashtu një rol të rëndësishëm në triumfin e Chelsea në Kupën e Botës për Klube.
Çmimi i transferimit mund të shkojë deri në 100 milionë euro, duke përfshirë bonuset. Chelsea e sheh 24-vjeçarin si një lojtar kyç për të ardhmen dhe nuk dëshiron ta shesë, sidomos pasi ai ka zgjidhur një pjesë të problemeve në repartin ofensiv.
Barcelona, nga ana tjetër, mund të përfitojë nga fakti që Chelsea nuk është kualifikuar në Champions League. Mundësia për të luajtur në kompeticionin më të madh europian me kampionët e Spanjës mund të jetë një faktor i rëndësishëm në vendimin e Joao Pedro.
Katalanasit pritet të lëvizin pas finales së FA Cup, ku Chelsea do të përballet me Manchester City në Wembley. Pas kësaj ndeshjeje, merkato pritet të hyjë në një fazë më konkrete për të dy klubet.
