Sergio Ramos dhe partnerët e tij janë pranë finalizimit të blerjes së Sevilla FC. Sipas Diario AS, Ramos dhe Five Eleven Capital kanë arritur marrëveshje me aksionarët kryesorë të klubit për çmimin e operacionit, që kap rreth 450 milionë euro, përfshirë edhe borxhet.
Marrëveshja përfshin edhe kalendarin e pagesave, i cili mund të ndryshojë në varësi të faktit nëse Sevilla do të qëndrojë në La Liga apo do të bjerë në kategorinë e dytë. Në rast rënieje, do të ketë më shumë kohë për të shlyer shumën.
Palët kanë përshpejtuar procesin, pasi letra e qëllimit e nënshkruar në janar mes Ramos, Five Eleven Capital dhe aksionarëve kryesorë skadon më 31 maj. Tashmë mbetet vetëm miratimi nga Këshilli i Lartë i Sportit në Spanjë dhe nënshkrimi i kontratave përfundimtare.
Përveç blerjes së aksioneve, grupi i Ramos pritet të kryejë edhe një rritje të rëndësishme kapitali, mes 80 dhe 100 milionë euro, për të ndihmuar në stabilizimin ekonomik të klubit dhe për të përmirësuar limitin e pagave, i cili ka ndikuar ndjeshëm në dobësimin e skuadrës gjatë viteve të fundit.
Situata ka shkaktuar habi te një pjesë e tifozëve të Sevilla, pasi negociatat po përshpejtohen në një moment kur skuadra është ende duke luftuar për mbijetesë në elitën e futbollit spanjoll. Sevilla ka përpara një ndeshje shumë të vështirë ndaj Villarreal, ku pritet të ketë edhe mbështetjen e rreth 600 tifozëve në transfertë.
