Pas humbjes së mbrëmshme ndaj Atalanta në San Siro, te AC Milan është zhvilluar një mbledhje në selinë e klubit me drejtuesit kryesorë të departamenteve.
Në Casa Milan, administratori i deleguar Giorgio Furlani ka takuar përgjegjësit e sektorëve të ndryshëm të klubit, me një mesazh të qartë: skuadra dhe klubi duhet të qëndrojnë të bashkuar, të ruajnë besimin dhe të punojnë në të njëjtin drejtim për të kaluar këtë moment të vështirë.
Protesta e tifozëve kuqezi në San Siro ka qenë e fortë dhe nuk është nënvlerësuar nga drejtuesit. Megjithatë, në klub kërkohet që tani e tutje të gjithë të fokusohen vetëm te objektivi kryesor: fitimi i dy ndeshjeve të ardhshme.
Gjashtë pikë do t’i siguronin AC Milan kualifikimin në Champions League për sezonin e ardhshëm. Në mbledhje ishte i pranishëm edhe Igli Tare, drejtuesi i departamentit sportiv.
Trajneri Allegri nuk ishte pjesë e takimit në seli, por pas mbledhjes së mbrëmshme në San Siro, ai dhe drejtuesit kanë vazhduar kontaktet edhe gjatë ditës së sotme. Klubi i ka konfirmuar besimin dhe mbështetjen trajnerit.
