Lirohen rreth një muaj pas arrestimit 5 protestuesit e opozitës që u arrestuan pasi akuzoheshin se sulmuan me molotov godinën e kryeministrisë dhe Policinë.
Gjykata e Apelit në Tiranë vendosi sot (11 maj) ndryshimin e vendimit të shkallës së parë, që dha “arrest me burg” për të dyshuarit, që u kapën në flagrancë me lëndë plasëse molotov në protestën kombëtare të PD më 17 prill.
Gjykata e Apelit u mblodh sot me kërkesë të palës mbrojtëse, e cila kërkoi lirimin nga qelia të pesë protestuesve që ndodheshin në masën e sigurisë “arrest me burg”.
Gjyqtari Dritan Hasa, pasi dëgjoi palët përfaqësuese, vendosi ndryshimin e masës së sigurisë nga “arrest me burg” në “detyrim paraqitje në policinë gjyqësore” për të dyshuarit; Klement Çuçka, Bujar Tusha, Henri Shapllo, Mirvet Tocilla dhe Semi Biçi.
Lidhur me protestën e 17 prillit, të organizuar nga PD, në total janë 11 protestues nën hetim. Pesë prej tyre u lanë në shkallën e parë në masën “arrest me burg” dhe sot dolën nga qelia, ndërsa për gjashtë të tjerët, gjyqtari i shkallës së parë Enkel Peza vendosi masën e sigurisë “detyrim paraqitje”.
Gjykata vendosi në shkallën e parë masën “detyrim paraqitje në policinë gjyqësore” për Bardhyl Ndoun, Sokol Bajraktarin, Igball Domin, Gentjan Tugën, Ernest Kapon dhe Edison Shytin.
Prokuroria e Tiranës i akuzon të dyshuarit për veprat penale të; “goditje për shkak të detyrës”, “prishja e qetësisë publike”, “shkatërrim i pronës me zjarr”, “kundërshtim i punonjësit të rendit” dhe “prodhimi dhe mbajtja pa leje e mjeteve të rrezikshme”.
Të akuzuarit për protestën e 17 prillit:
Ishin në arrest me burg:
Klement Çuçka
Bujar Tusha
Henri Shapllo
Mirvet Tocilla
Semi Biçi
Detyrim paraqitjeje:
Bardhyl Ndou
Sokol Bajraktari
Igball Domi
Gentjan Tuga
Ernest Kapo
Edison Shyti
