Legjenda e Brazilit, Cafu, ka bërë një deklaratë të fortë për Neymar, duke thënë se sulmuesi brazilian ka qenë teknikisht më i mirë se Cristiano Ronaldo dhe Lionel Messi.
Ish-mbrojtësi i famshëm, i cili ka luajtur në tre finale radhazi të Botërorit, beson se një Neymar në formë të mirë mbetet një lojtar vendimtar për kombëtaren e Brazilit.
“Për mua, Neymar ishte teknikisht edhe më i mirë se Cristiano Ronaldo dhe Lionel Messi. Ai ka pasur një karrierë të shkëlqyer”, tha Cafu për The Times.
Neymar, tashmë 34 vjeç, po përpiqet të rikthehet në formën më të mirë te Santos, pas disa sezoneve të vështira të ndikuara nga dëmtimet. Edhe pse karriera e tij është shoqëruar shpesh me debate dhe pritshmëri të mëdha, Cafu mendon se Brazili ka nevojë për një lojtar si ai në Botëror.
“Çdo skuadër që ka një lojtar vendimtar si Neymar ka nevojë për të. Nëse Neymar është në gjendje të mirë fizike, taktike dhe teknike, është e qartë që ai mund të vendosë ndeshje. Por vetëm Ancelotti mund të vendosë dhe vetëm Neymar e di nëse është gati”, shtoi Cafu.
Brazil po hyn në një epokë të re me Carlo Ancelotti në stol. Edhe pse emërimi i një trajneri të huaj ka sjellë diskutime, Cafu e mbështet italianin dhe beson se ai mund ta çojë Brazilin drejt yllit të gjashtë në Botëror.
Sipas Cafu, Ancelotti është “trajneri italian më brazilian”, pasi ka punuar me shumë lojtarë brazilianë gjatë karrierës së tij. Ai mendon se Brazili mund të kombinojë disiplinën italiane në mbrojtje me talentin brazilian në sulm.
Në fund, Cafu kujtoi edhe mënyrën se si Brazili përballoi presionin para finales së Botërorit 2002 ndaj Gjermanisë. Sipas tij, lojtarët luajtën golf në korridorin e hotelit për t’u relaksuar para ndeshjes më të rëndësishme.
