“Vëllai për motrën shemb botën”, është shprehja popullore që përdoret për të treguar lidhjen e fortë dhe mbrojtjen mes familjarëve, por në Elbasan një konflikt familjar ka degjeneruar në një akt të rëndë vetëgjyqësie.
Në Cërrik, një 54-vjeçar dyshohet se ka dëmtuar me ekskavator banesën në pronësi të dy motrave të tij, duke shkaktuar shqetësim në zonë për mënyrën e pazakontë dhe të rrezikshme të veprimit.
Sipas Policisë së Shtetit, specialistët për Hetimin e Krimeve në Komisariatin e Policisë Cërrik kanë ndërhyrë menjëherë pas njoftimit dhe kanë arrestuar në flagrancë shtetasin A. P., 54 vjeç.
Dyshohet se veprimi është kryer për motive vetëgjyqësie, ndërsa mjeti i rëndë është përdorur për të dëmtuar strukturën e banesës.
Policia po vijon hetimet për zbardhjen e plotë të rrethanave të ngjarjes, ndërsa materialet procedurale i janë referuar Prokurorisë për veprime të mëtejshme ligjore.
