TikTok ka rifilluar shërbimin për 170 milionë përdoruesit e saj në SHBA, pasi presidenti i zgjedhur, Donald Trump, njoftoi se do të nxjerrë një urdhër ekzekutiv për të shtyrë ndalimin e aplikacionit kur të marrë detyrën të hënën.
Të shtunën në mbrëmje, aplikacioni i zotëruar nga Kina pushoi së funksionuari për përdoruesit amerikanë, pasi një ligj që e ndalonte atë për arsye të sigurisë kombëtare hyri në fuqi.
Trump, i cili më parë kishte mbështetur ndalimin e platformës, premtoi të dielën se do të shtynte zbatimin e ligjit, duke lejuar më shumë kohë për arritjen e një marrëveshjeje. TikTok më pas njoftoi se po punonte për të “rikthyer shërbimin”.
Pas kësaj, aplikacioni rifilloi dhe dërgoi një mesazh falënderimi për përdoruesit, ku falënderohej Trump me emër. Në një deklaratë, kompania falënderoi presidentin e ardhshëm për “qartësinë dhe sigurinë e dhënë” dhe shprehu gatishmërinë për të punuar me të në një “zgjidhje afatgjatë që ruan TikTok në SHBA”.
Polemikat dhe përplasjet
Ligji që ndalonte TikTok, i miratuar në prill të vitit të kaluar, kërkonte që versioni amerikan i aplikacionit të hiqej nga platformat e aplikacioneve dhe shërbimet e hostimit nëse kompania mëmë kineze, ByteDance, nuk shiste operacionet e saj në SHBA.
TikTok argumentoi në Gjykatën Supreme se ligji shkelte të drejtën e fjalës së lirë për përdoruesit amerikanë. Megjithatë, ligji u mbështet nga të dyja partitë politike në Kongres dhe u miratua unanimisht nga Gjykata Supreme këtë javë.
Donald Trump, duke postuar në platformën e tij Truth Social, tha të dielën: “Unë po kërkoj nga kompanitë të mos lejojnë që TikTok të ndalojë së funksionuari! Të hënën do të nxjerr një urdhër ekzekutiv për të shtyrë zbatimin e ndalimit.”
Ndërkohë, disa senatorë republikanë dhe përfaqësues të shtetit mbeten të vendosur në mbështetje të ndalimit të platformës, duke e konsideruar atë një kërcënim për sigurinë kombëtare.
Çfarë pritet të ndodhë?
Profesor Carl Tobias nga Universiteti i Richmond-it shpjegon se ligji përfshin një klauzolë që i lejon presidentit të shtyjë ndalimin deri në 90 ditë, nëse kompania arrin progres të konsiderueshëm në adresimin e shqetësimeve të sigurisë kombëtare.
“Presidenti Trump do të bënte mirë të punonte me Kongresin për të shmangur ndonjë shkelje të mundshme të ligjit,” tha Tobias.
Ndërkohë, TikTok vazhdon të jetë një mjet i rëndësishëm për krijuesit e përmbajtjeve dhe fushatat politike për të arritur te votuesit e rinj. Por mbetet e paqartë nëse Google dhe Apple do të lejojnë rikthimin e aplikacionit në dyqanet e tyre të aplikacioneve.
E ardhmja e TikTok në SHBA mbetet ende e pasigurt, ndërsa pritet që presidenti i ardhshëm të nxjerrë urdhrin ekzekutiv të hënën.
