Sipas raportimeve mediatike, kompania ajrore amerikane Spirit Airlines po përballet me një mbyllje të menjëhershme të aktivitetit të saj, pasi nuk arriti të sigurojë një paketë shpëtimi financiar prej rreth 500 milionë dollarësh nga administrata e SHBA-ve.
Në këto raportime thuhet se kompania ishte në bisedime me qeverinë e SHBA-ve për një marrëveshje emergjente që do ta ndihmonte të shmangte falimentimin dhe mbylljen, por negociatat kanë dështuar dhe si pasojë kompania ka njoftuar fillimin e një procesi të “mbylljes së rregullt të operacioneve me efekt të menjëhershëm”.
Sipas të njëjtave burime, të gjitha fluturimet e ardhshme të Spirit Airlines janë anuluar, ndërsa pasagjerët që kanë bileta nuk pritet të marrin rimbursim të drejtpërdrejtë nga kompania gjatë procesit të mbylljes. Thuhet se disa klientë mund të kërkojnë kthim parash përmes kompanive të kartave të kreditit, nëse fluturimet nuk realizohen.
Gjithashtu raportohet se shërbimi ndaj klientit i kompanisë nuk është më aktiv, duke e bërë të pamundur kontaktin për ndryshime ose ndihmë për udhëtarët.
Në analizat e tregut të përmendura në këto raportime, rritja e fortë e çmimeve të karburantit për avionë është cilësuar si një faktor kryesor që ka përkeqësuar situatën financiare të kompanisë. Thuhet se kostoja e karburantit ka pasur rritje të madhe në muajt e fundit, duke ushtruar presion të fortë mbi linjat ajrore me kosto të ulët si Spirit.
Po ashtu, disa analistë citohet të kenë thënë se kompania ishte tashmë në një situatë të brishtë financiare, edhe para krizës së çmimeve të karburantit, dhe se proceset e mëparshme të ristrukturimit nuk kanë sjellë stabilitet të mjaftueshëm për të garantuar mbijetesën afatgjatë.
