Një lajm shqetësues ka ardhur nga Anglia pak para supersfidës së Premier League mes Manchester United dhe Liverpool. Legjenda e pankinës së “Djajve të Kuq”, Alex Ferguson, është dërguar në spital pasi nuk është ndjerë mirë në “Old Trafford”.
Sipas Daily Mail, 84-vjeçari skocez nisi të ndiente shqetësime gjatë pasdites së të dielës, pak para nisjes së ndeshjes. Stafi mjekësor vendosi ta transportojë në spital si masë paraprake.
Megjithatë, raportimet theksojnë se gjendja e Ferguson nuk paraqet shqetësim serioz. Vendimi për shtrimin e tij u mor kryesisht për siguri, duke qenë se incidenti ndodhi më pak se një orë para fillimit të njërës prej ndeshjeve më të rëndësishme të futbollit anglez.
Ferguson është një nga trajnerët më të mëdhenj në historinë e futbollit. Ai drejtoi Manchester United nga viti 1986 deri në vitin 2013, duke fituar plot 38 trofe, mes tyre 13 tituj në Premier League.
Gjatë periudhës së tij në krye të klubit, Manchester United u kthye në një fuqi botërore të futbollit. Edhe pas tërheqjes nga trajningu, Ferguson ka vazhduar të jetë shpesh i pranishëm në ndeshjet e United dhe mbetet një figurë historike për klubin.
