Përballja mes PSG dhe Bayern Munich, e mbyllur me rezultatin spektakolar 5-4, pritet të mbetet si një nga ndeshjet më të paharrueshme të futbollit modern. Gjysmëfinalja e parë e Champions League dhuroi plot nëntë gola dhe mori vlerësime të mëdha në botën e sportit.
Megjithatë, jo të gjithë e panë me të njëjtin entuziazëm. Disa e cilësuan ndeshjen si një mungesë respekti ndaj futbollit, për shkak të dobësive në mbrojtje dhe mungesës së kontrollit në mesfushë.
Pep Guardiola nuk i shpëtoi këtij debati dhe e komentoi sfidën me sarkazëm në konferencë për shtyp.
“Një ditë më parë pashë PSG-Bayern dhe mendova: ‘Çfarë ndeshjeje katastrofike’. Për më tepër, nuk mendoj se trajnerët, Luis Enrique dhe Vincent Kompany, janë veçanërisht të mirë, ndërsa niveli i disa lojtarëve është për të ardhur keq”, tha Guardiola me ironi.
Më pas, trajneri spanjoll shtoi se kishte zgjedhur të largohej për pak nga vëmendja e futbollit evropian.
“Jam i dashuruar me futbollin anglez, prandaj shkova të shikoja Stockport”, u shpreh ai.
Guardiola foli edhe për ndeshjen Arsenal-Atlético Madrid, duke bërë sërish batuta me gazetarët.
“Kjo është bukuria e futbollit. Ti dhe unë nuk jemi njësoj, unë jam më i bukur se ti”, tha ai duke qeshur.
Megjithatë, pavarësisht kritikave për aspektin taktik, Guardiola pranoi se ndeshjet kishin ofruar spektakël dhe emocione të ndryshme nga ato që zakonisht shihen në nivelin më të lartë.
Ndërkohë, situata te Manchester City vazhdon të ndikohet nga dëmtimet, sidomos nga pasiguria rreth Rodri, i cili është jashtë që prej fundit të prillit.
“Ai po përmirësohet, por ende nuk është stërvitur me ne. Do të shohim në ditët në vijim. A jam i bindur se do të jetë gati për Everton? Unë jam gjithmonë i bindur”, tha Guardiola.
Trajneri i City foli edhe për kalendarin e ngjeshur në Premier League, duke pranuar se skuadra duhet të përshtatet me situatën.
“Është ajo që është. Do të preferoja të isha duke luajtur një gjysmëfinale të Champions League, por prej kohësh nuk pres më asgjë. Përshtatemi dhe marrim ndeshjet një nga një, pa pritur ndihmë nga askush”, përfundoi ai.
