Frika më e madhe është konfirmuar te Paris Saint-Germain. Achraf Hakimi nuk do të jetë në dispozicion të Luis Enrique për ndeshjen e kthimit ndaj Bayern Munich në gjysmëfinalen e Champions League.
Sipas “RMC Sport”, pas fitores dramatike 5-4 në “Parc des Princes”, ku mbrojtësi maroken pësoi dëmtim në minutat e fundit, ekzaminimet mjekësore kanë zbuluar një problem serioz.
Testet e kryera kanë përjashtuar mundësinë që të bëhej fjalë thjesht për ngërç muskulor. Hakimi është diagnostikuar me një dëmtim në muskujt e pasmë të kofshës dhe do të mungojë me siguri në sfidën e së mërkurës në Munich.
Megjithatë, parashikimet e para janë disi pozitive për PSG, pasi 27-vjeçari mund të rikuperohet në kohë për finalen, nëse parisienët arrijnë të kualifikohen.
Dëmtimi ndodhi në minutën e 88-të, pas një dueli me Konrad Laimer. Me Luis Enrique që i kishte kryer të gjitha zëvendësimet, Hakimi u detyrua ta mbyllte ndeshjen në fushë, pavarësisht dhimbjeve.
