Bayern Munich e konsideron Michael Olise të paprekshëm në merkato, pavarësisht ofertave që mund të mbërrijnë për të.
Karl-Heinz Rummenigge e bëri të qartë qëndrimin e klubit në një intervistë për faqen gjermane “t-online”, ku nuk kurseu vlerësimet për anësorin francez.
“Ai është një lojtar i mrekullueshëm. Më pëlqen shumë edhe fakti që është i rezervuar dhe pothuajse i distancuar nga media. Kjo është diçka e rrallë në ditët e sotme. Është një djalë fantastik dhe në fushë është i jashtëzakonshëm. Stili i tij i lojës është pothuajse magjik. Prandaj nuk më habit aspak që është kaq i dashur dhe ka kaq shumë mbështetje nga tifozët tanë”, u shpreh Rummenigge, aktualisht anëtar i bordit mbikëqyrës të Bayern.
I pyetur nëse Bayern do ta refuzonte një ofertë hipotetike prej 200 milionë eurosh, Rummenigge kujtoi një rast nga e kaluara me Franck Ribery.
“Në vitin 2009 morëm një ofertë të jashtëzakonshme nga Chelsea për Ribery. Në atë kohë, do të ishte një transferim rekord botëror. Ia çova ofertën drejtorit tonë financiar të atëhershëm, Karl Hopfner, dhe Uli Hoeness. Diskutuam për dy orë për të kuptuar çfarë duhej të bënim”, tha ai.
Rummenigge shpjegoi se pikërisht atë ditë Bayern mori një vendim që vazhdon të ndikojë politikën e klubit edhe sot.
“Atë ditë morëm një vendim themelor: në të ardhmen nuk do të shisnim kurrë një lojtar që do të na mungonte në fushë. Ky rregull i pashkruar vlen ende sot. Për një lojtar si Olise, nuk ka asnjë çmim që do të na bënte të hezitonim”, përfundoi drejtuesi i Bayern.
