Kryetarja e Kuvendit të Kosovës, Albulena Haxhiu, është detyruar për herë të tretë të shtyjë seancën plenare për zgjedhjen e presidentit, për shkak të bojkotit të vazhdueshëm nga deputetët e opozitës.
Gjatë seancës e cila rinisi pak minuta më parë, Haxhiu, menjëherë në nisje u bëri thirrje të gjithë deputetëve opozitarë duke i përmendur secilin me emra që të paraqiten në seancë. Mirëpo, kjo thirrje e saj u la pa një përgjigje duke e detyruar që pas fjalës së një deputeti nga Lista Serbe, të shtyjë seancën për sot të orën 19:00, me lutjen karshi opozitarëve për t’u paraqitur.
“Kjo seancë vazhdon sot në orën 19:00, shihemi në oreën 10 dhe i bëj lutje opozitës që të jenë të pranishëm në atë seancë” u shpreh ajo ndër të tjera.
Kujtojmë se dita e sotme është afati i fundit për zgjedhjen e presidentit në Kuvend, në të kundërt procesi kalon fillimisht në “Kushtetuese” dhe më pas kalohet në zgjedhje.
Situata politike në Kosovë vijon të mbetet e paqartë, pasi opozita ka shfaqur hezitim për t’u përfshirë në seancë, ndonëse ka sinjale të lëvizjeve individuale nga radhët e saj. Ndërkohë, Lidhja Demokratike e Kosovës ka propozuar emrin e Vjosa Osmanit për presidente, duke siguruar mbështetjen fillestare brenda grupit të saj parlamentar.
Procesi për zgjedhjen e kreut të shtetit kërkon një mbështetje më të gjerë në Kuvend, ndërsa dështimi për të arritur konsensus rrezikon ta çojë vendin drejt zgjedhjeve të reja parlamentare. Seancat e fundit janë shoqëruar me mungesë kuorumi dhe tensione politike, duke e lënë këtë proces në ngërç.
