Liverpool është në pritje për të kuptuar nëse Mohamed Salah e ka luajtur ndeshjen e fundit me klubin, pas dëmtimit të pësuar ndaj Crystal Palace. Sulmuesi egjiptian u zëvendësua në minutën e 59-të, pasi ndjeu shqetësim në hamstringun e majtë.
Trajneri Arne Slot pranoi se është ende herët për të dhënë një përgjigje përfundimtare. “Të gjithë e dimë sa e vështirë është për Mo të largohet nga fusha. Fakti që doli, tregon diçka, por duhet të presim për të parë sa serioz është dëmtimi”, u shpreh ai.
Salah, i cili ka njoftuar se do të largohet nga Liverpool në fund të sezonit, u largua nga fusha duke përshëndetur tifozët në Anfield, një moment që ka shtuar dyshimet se mund të ketë qenë paraqitja e tij e fundit me fanellën e “Reds”.
Egjiptiani është pjesë e Liverpool që nga viti 2017 dhe ka fituar gjithçka me klubin, duke u kthyer në një nga legjendat moderne të skuadrës. Me 257 gola në 435 ndeshje, ai renditet i treti në listën historike të golashënuesve të klubit.
Slot shpreson që Salah të rikthehet përpara fundit të sezonit, por gjithçka do të varet nga ekzaminimet mjekësore dhe koha e rikuperimit.
