Presidenti i Paris Saint-Germain, Nasser Al-Khelaifi, ka shprehur mbështetjen e tij të plotë për Luis Enrique, duke e cilësuar trajnerin spanjoll si një nga vendimet më të mira të karrierës së tij.
Gjatë eventit “The Forum” në Madrid, Al-Khelaifi u pyet për sukseset e fundit të klubit dhe nuk ngurroi të vlerësonte punën e Luis Enrique dhe drejtorit sportiv Luis Campos. Sipas tij, të dy janë pjesë thelbësore e projektit të PSG-së dhe kanë ndërtuar një filozofi të qartë pune.
“Ata kanë gjithçka. Bëjnë një punë fantastike. Jo vetëm sepse fituan vitin e kaluar, por për mënyrën si punojnë, për filozofinë dhe karakterin e tyre. Janë paketë e plotë, si në momentet e mira, ashtu edhe në ato të vështira”, u shpreh Al-Khelaifi.
Për Luis Enrique, ai shtoi se është një nga njerëzit më pozitivë që ka njohur ndonjëherë. “Edhe kur është i mërzitur, ai gjithmonë motivon. Në futboll humbet ndeshje dhe turne, por mëson si të përmirësohesh çdo ditë”, deklaroi presidenti i PSG-së.
Al-Khelaifi foli edhe për vendimet e mëdha të viteve të fundit, përfshirë largimet e Donnarumma, Neymar dhe Mbappé. Ai theksoi se nuk pendohet për asnjë vendim, pasi çdo zgjedhje ka qenë pjesë e procesit të të mësuarit dhe zhvillimit të klubit.
“Nuk pendohem për asnjë vendim. Edhe nëse gabon, mëson. Nëse do të kthehesha pas, do të bëja të njëjtën gjë”, tha ai.
PSG e mbyll sezonin me objektiva të mëdha në Ligue 1 dhe Champions League, ndërsa Al-Khelaifi theksoi se prania në gjysmëfinalet e Champions League për tre vite radhazi është një arritje shumë e rëndësishme për klubin parisien.
